Christina Hardenberg-imik ateqarpunga. Nunatsinni akuerisaasumik ergoterapeutitut allagartaqarpunga maanna ukiuni 7-ninngortuni nammineq “Christinami Ergoterapi-mi” ingerlatsillunga, suliakkalu nuannaarutiginartumik ineriartoruusaaleqqapput.

Sianiutinik timimillu sungiusaaneq
Meeqqat inuusuttut inersimasullu sianiutikkut maluginiutikkut timikkullu ajornartorsiuteqarnermi kingunerisaanik ulluinnarni inuunermi atugarissaarsinnaalersitsisussamik, timi atorlugu aalasinnaalersitsisussamik inuillu akornanni peqatigiinnernilu ineriartorsinnaalersitsisussanik ilikkarsinnaalersitsisussanillu peqalersitsiniarlunga misissuineq sungiusaanerlu neqeroorutigisarpakka.
Suliakka inulerisunut peqqissaanermik sulialinnut, atuartitsisunut, perorsaasunut angajoqqaanullu attuumassuteqarluinnarput.

Neriuppunga meeqqamut inuusuttumut angajoqqaaguit, sullissisuuguilluunniit quppernerup imarisai suliannut tunngassuteqarpata isumassarsiorfittut atorsinnaagitit

Christinami Ergoterapi-mi meeqqanut inersimasunullu pillorissaanermi misissuinerit sungiusaanerillu neqeroorutigineqarput. Misissuinerit allaavigalugit tulluarsakkamik sungiusaanissaq sullitaq qanigisat sullissisullu suleqatigilluinnarlugit piareersarneqartarpoq ingerlanneqarlunilu

Saniatigullu peqqissaanermik sungiusaanermik perorsaanermilu suliaqartunut pikkorissaanerit ornigullunga ingerlattarpakka.

Inuunerissaarnissamut aqqutissiuineq
Meeqqanik inuusuttunik inersimasunillu qaratsatta suleriusaanik atuartitsineq ingerlattarpara. Ataasiakkaarinermi, aappariinnut suleqatigiinnullu ingerlanneqartarpoq.

Nakkutilliineq
Ukiorpassuit isumaginninnerup silarsuaani sulinikuunera tunngavigalugu ullumikkut nakkutilliinerit ingerlassinnaasarpakka. Nalinginnaasumik nalunaarusiorneq qallunaatut nalunaarusiarisarpara, tigusisussat namminneq kalaallisuunngortinnissaa isumagissavaat.